Við hér í dalnum byrjuðum vertíðina strax eftir hádegi í gær.  Við urðum strax varir við að lax væri kominn um alla á og eftir stutta stund kom einn á land í Torfhvamshyl en hann er um 35 km frá sjó.  Þegar við lönduðum þessum laxi sáum við að hann var með halalús sem sýnir hversu góð skilyrði eru hérna í dalnum í dag. Þegar leið á daginn voru menn og konur svolítið í því að missa laxa en einnig vorum menn að reisa laxa um ána. Mennsettu í lax í Hraunhyl og annan við Álkubrú en venjulega kemur Álkan ekki inn fyrr en svon 10 til 12 júlí þannig að laxinn virðist vera fyrr á ferðinni hér, eins og víðast hvar annarsstaðar á landinu. 

Í heildina var þetta skratti erfiður en það var suð-austan hávaðarok sem var hent í okkur um leið og við opnuðum. Ekki veit ég hvern fjandan við höfum gert veður guðunum því þegar þetta er skrifað horfi ég út á hvíttfrissandi Flóðið og velti því fyrir mér hvort ég á að vera svo vitlaus að reyna að veiða Hnausastreng sem er orðin kolmórauður og afar slæmur yfirferðar.

Það sem stóð uppúr gærdeginum að það var landað 4 löxum, 2 voru og eru um 86cm og einn 99cm hængur úr Hnausa.  Síðan kom þessi gull fallega hrygna sem var um 76 cm úr Torfhvamshyl. Það segir margt um okkur sem köllum okkur veiðimenn að þegar var verið að landa einum af löxunum úr Hnausastreng en þar sem ekkert sást til botns vegna litarins sem kominn var í ána. Svo stakkst veiðimaðurinn á bólakaf í ána en stönginni hélt hann upp úr þannig að það sást bara framhandleggur og stöng.  Eftir töluverðan tíma og mikið busl tókst honum að fóta sig bara en það um leið og hann var búinn að ná jafnvægi þá stakkst hann á hausinn aftur.  Sem betur fer bjargaðist hann og tókst að landa 86 cm laxi..

Hér á myndinni má sjá Grétu halda á 99cm hæng úr Hnausa í gær.

Jú sveimérþá, ég ætla út og glíma við skrattans veðrið.

Megi laxinn lifa