Þann 20.06 eftir hádegi opnuðum við Vatnsdalsá. Núna nokkrum dögum seinna þegar þetta er skrifað hefur verið landað 7 löxum og höfum við séð það svartara hérna í dalnum áður. Síðustu 3 ár eða 2016, 2017 og 2018 voru eiginlega í sérflokki því á þessum sama tíma var búið að skrá í bók 67 laxa, 34 og 25 í sömu röð og árin eru nefnd hér á undan. Öll árin aftur til 2005 eru tölur allar mun lægri eða frá 2 löxum og og uppí 13 laxa þann 23.06 að kvöldi.

Svona fyrst maður er að rýna í fyrri ár má til gamans nefna að 2015 þá höfðu veiðst 9 laxar á svipuðum tíma en  það ár endaði með 1296 laxa.  Einnig getum við tekið fyrir árið 2007 þá höfðu veiðst 2 laxar þann 23.06 og það ár endaði í 1398 löxum. Þau 3 ár sem áður eru nefnd voru mun slakari (þetta má skoða í veiðibókini okkar á vatnsdalsa.is ) en þetta segir okkur að það er einfaldlega ekkert að marka upphafstölur á veiðitímabilinu.

Einnig höfum við mikið rætt um vatnsskortinn og eru margar ár í miklum vandræðum.  Við hér í Vatnsdal erum um borð í sama bát og höfum líka áhyggjur af þurrkinum og þá kannski aðalega út af sprettunni á túnunum. Við erum svo heppnir að við búum betur en margir aðrir hvað varðar vatnsbúskap í ánni sjálfri og hér virðast allar gönguleiðir laxins vera opnar þrátt fyrir að meðal renslið sé helmingi minna en í venjulegu ári og elstu men muna ekki eftir ánni í svona lágri vatnsstöðu. Miðað við það sem við vitum og höfum heyrt af þá er töluvert að laxi niður við ós og í Húnavatninu. Danskir veiðimenn sem nú eru á silungasvæðinu hafa sett í töluvert marga laxa og slegist við þá, margir hafa haft betur en aðrir hafa verið handsamaðir.

Það ber að segja frá því að þessir Dönsku heiðursmenn hafa sleppt öllum löxum sem þeir hafa handsamað þá er einnig rétt að geta þess að laxinn hefur veiðst á gárutúbu á harða strippi.

Að þessu sögðu og með bros á vör bíðum við spentir eftir að laxinn drífi sig uppeftir.

Megi laxinn Lifa